mtegwagkik ėgibbamséyan

mtegwagkik ėgibbamséyan gwitth'bmadzimnanêk ngiwabmak. odë wpi gwinathmëwnëm gi gwitth'bmadzimnanêk gawabmëgwa.

'mshkëkwatêk' zhenkanawan nodë mtêgon anet bodwéwadmik. wégwnithë wėthezhnëkanawat. wnëgégon wdëyowawan ėwimshkëkikéwat. wiyé odë wėthezhnëkanawat. bnéshiyêk wwigiwshkwėbyéwêk gishpen mithnëwat ni giwshkwébyémnen. wiyé i gé wėthezhnëkanayét 'giwshkwėbyémnëgawêsh.'

wigbëmshêk gé ngiwabmak. wigbemshen wdëbapagakw’ëgéwêk atheniptowat ni shkëmten.

senamshêk gé ngi wabmak. 'ziinzibaakwadwaatigoog' zhenkanawan gi wthebwék. zisbakwtokégizes ėgothêk wi wėp'bkonké. i wpi wwipawzhêk'ëgéwêk gi neshnabék iwthé shna wwiskëgmezgéwêk athezisbakwtokéwat. wėtth ksenyak wthë'igwan ėthëmathigwat godë mtegok, wiyé odë wėthezhnëkanaywat 'senamshêk' gi bodwéwadmik.

winëmskwabêgya miné gé winëwzawbêgya ėnëdgwagëk. wiyé i wėthezhnëkanayét 'wzawbêgyagizes' o dbêk'gizes ėgothêk.

pkanatkos gézhé ngiwabma. pkanen ntamawdonen gi sengoyêk. wdëyowawan ni wnëgégon gi bodwéwadmik gokpenagnen athewzawtésmëwat. 

sengok wmenpëdanawan ma nodë beganen.

amowshêk miné ngiwabmak. amowshen wdëyowawan ėwigobzowat gi nadwésik.